നോം പെന്നിലെ രണ്ടു ദിവസം പെട്ടെന്ന് കഴിഞ്ഞു. രാജകൊട്ടാരത്തി ന്റെയും കാഴ്ചബന്ഗ്ലാവിന്റെയും ഗാംഭീര്യത്തിനും കൂട്ടക്കൊല നടന്ന സ്ഥലം കണ്ടതിന്റെ ഞെട്ടലിനും വിട പറയാന് സമയമായി. ഞങ്ങളുടെ യാത്രയുടെ പ്രധാന ലക്ഷ്യമായ ആന്ഗ് കോര് ക്ഷേത്രങ്ങള് കാണാന് സുമാര് ആറു മണിക്കൂര് നോം പെന്നില് നിന്ന് റോഡു മാര്ഗം യാത്ര ചെയ്യണം, ചില സ്ഥലങ്ങളില് റോഡ് അത്ര നല്ലതല്ല എന്ന് മുന്പേ അറിഞ്ഞിരുന്നു. ഏതായാലും ഉച്ച ഭക്ഷണം വീണ്ടും ഒരു ഇന്ത്യന് ഭക്ഷണ ശാലയില് നിന്ന് കഴിച്ചു ഒന്നര മണിക്ക് ഒരു ലക്ഷ്വറി ബസ്സില് യാത്ര തുടങ്ങി. ബസ്സ് കുഴപ്പമില്ല, നമ്മുടെ വോള്വോ ബസ്സ് പോലെയുള്ള നല്ല വാഹനം. കമ്പനി ജര്മ്മന് വോള്വോ അല്ല കൊറിയന് ഹ്യുണ്ടായ് ആണ് എന്ന് മാത്രം.
പോകുന്ന വഴി റോഡരുകില് നാല് കാലിന്മേല് ഒരു വലയും താഴെ ഒരു വലിയ പാത്രത്തില് വെള്ളവും വച്ചിരിക്കുന്നു, ഇതെന്തു പരിപാടി വായുവില് നിന്ന് മീന് പിടിക്കുന്ന പരിപാടിയോ എന്ന് സംശയിച്ചിരുന്നപ്പോള് നമ്മുടെ നേതാവ് പറഞ്ഞു അത് മുമ്പ് കണ്ട വെട്ടുക്കിളിയെയും മറ്റും പിടിക്കാനുള്ള ഉപകരണമാണ് എന്ന്. വലയില് കുടുങ്ങിയ വെട്ടുക്കിളി വെള്ളത്തില് വീഴുന്നു അത്തില് നിന്ന് രക്ഷപെടാന് കഴിയുകയില്ല, രാവിലെ സൗകര്യം പോലെ ചെന്നെടുത്താല് മതി. ഈയാംപാറ്റപോലെയുള്ളവ ആണെങ്കില് ചിറകും പോയി കിട്ടിയിരിക്കും.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ